José Antonio Gómez : “Non imos permitir que os traballadores sexan os que paguen o peso desta crise”

O líder de UGT en Galicia sinala que a aprobación da directiva suporía “retroceder incluso ao século XIX”

– ¿É decente elevar a xornada laboral de 48 a 65 horas? – Non é decente e, ademais, constitúe unha regresión en materia de dereitos laborais e un paso cara atrás moi perigoso que tiraría abaixo moitas das conquistas laborais dos últimos anos retrocedendo, incluso, ata case o século XIX. Xa no 1919 establecíase a semana de 48 horas, que a UE viña recoñecendo estes principios dende a súa fundación.

– ¿Porque propón o aumento agora? – A Directiva non é allea a un contexto de globalización inxusta marcado por unha crise mundial na que Europa está a tomar medidas perigosas. A mensaxe que parece enviar con esta directiva e outras, como a directiva de retorno, é que lles pechamos a porta aos inmigrantes pero como temos que seguir explotando ó factor traballo, alongámoslle a xornada laboral ata as 65 horas aos traballadores autóctonos para que sexan os traballadores os que paguen o peso da crise.

– ¿Onde deixa esta medida a negociación colectiva e o diálogo social? – O primeiro, esta medida o que fai é individualizar as relacións laborais ao establecer que empresario e traballador poderán poñerse de acordo para que a xornada deste último se poida prolongar ata as sesenta e cinco horas. O acordo individual entre empresa e traballador deixa a este nunha posición de negociación máis débil e, practicamente, a mercé da empresa. A todas luces, esta medida supón un atentado contra o corazón mesmo das relacións laborais, a negociación colectiva, e un paso cara a atrás en moitos dos acordos conseguidos nos últimos tempos.

– As administracións española e galega, ¿rexeitárona como era debido? – Nestes momentos contamos con senllas mocións parlamentarias de rexeitamento á directiva, apoiadas por todos os grupos, tanto do Parlamento estatal como do galego. Tamén existen mocións moi similares en moitos dos concellos galegos. E, ademais, os gobernos galego e español xa se pronunciaron en contra da medida e amosaron o seu apoio á mobilización do día 7.

– As 35 horas, ¿son hoxe inviables? – Hai que precisar que a directiva aínda non foi validada nin convertida en norma: hai tempo para poñerlle freo e por iso imos manifestarnos o vindeiro día 7. Consideramos que os obxectivos de repartición de traballo e reorganización do tempo de traballo co fin de garantir a conciliación da vida laboral e persoal están hoxe máis vixentes que nunca.

– ¿Que lle diría vostede a Díaz Ferrán, que quere facilitar o despedimento nestes tempos de crise? – Pois algo moi fácil de entender. Esta crise é a consecuencia dunha serie de factores, externos ao noso propio país, a crise do petróleo, a crise financeira e cunha base especulativa moi forte. Nestes factores nada teñen que ver os traballadores, polo que non imos consentir que sexan os pagáns dunha situación que non crearon.